མི་ཚེར་སྡུག་པ།
རྨི་ལམ་དུ་མེ་སྟག་མཆེད་ཀྱིན་པ་ཞིག་རྨིས་པས
ཆར་བ་ཟམ་ཟིམ་ཞིག་བབས་ན་བསམ
གཉིད་ལས་སད་བྱུང་།
རྨི་ལམ་ངོགས་ཀྱི་མེ་སྟག་དེ་འཚོ་བའི་ངོགས་སུ་རིམ་བཞིན་ཇེ་ཆེར་གྱུར་བས
ང་ལ་དབང་བའི་གྲུ་ཁ་ཆུང་ཆུང་འདིར་་ངའི་བློ་སྙིང་ཡང་ཚིགས་སོང་།
ངས་སྐྱི་ལྤགས་མཛེས་པོ་དེའི་ནང་དུ་བློ་སྙིང་བོར་བ་བསམ་དུས
ངའི་སྐྲ་ལོ་དང་བ་སྤུ་ཡང་མེ་ཡིས་འཇོམས་ལ་ཁད་བྱེད་བྱུང་
ལག་ཟུང་བྲང་ལ་བཞག་ན་སྟོང་བ་རེད
ཚོར་བས་ནང་ཁོག་སྔོགས་ན་སྟོང་བ་རེད
མི་ལོ་༢༩ལ་ཕྱིར་མིག་ལྟ་དུས
རྨི་ལམ་ནི་ངས་ཡི་གེ་འདི་འབྲི་གྱིན་པའི་སྔ་རོལ་ཐམས་ཅད་རེད་ལ
ང་སྟོང་བར་གྱུར་བའི་ཡི་གེ་འདི་ཀློག་གིན་པའི་ཁྱེད་ཀྱི་འདས་སོང་ཚང་མ་རེད
རྨི་ལམ་ནི་མཛེས་པའི་རི་མོ་ཞིག་རེད་ལ
རྨི་ལམ་དེ་གས་ཆག་ཤོར་བའི་བུམ་པ་ཞིག་ཀྱང་རེད
རྨི་ལམ་ནི་འདས་སོང་གི་ཁ་སང་ཡོད་ཚད་རེད་ལ
རྨི་ལམ་ནི་མ་འོངས་པའི་མི་ཚེ་ཟེར་བ་དེ་ཡང་རེད
བློ་སྙིང་མེ་ཡིས་ཚིགས་ཏེ བློ་སྙིང་ས་ལ་ལྷུང་བའི་མི་མང་པོ་ཞིག
མིག་ཆུའི་ཐིགས་པ་གཅིག་རེ་
མཆོད་མེ་རྐང་གཅིག་འབར་བའི་མེ་ལྕེ་རེ་ལ་བརྗེ་བཞིན
སྨྲེང་སེམས་རླུང་དང་ཆུ་ལ་སྐུར་ཐུབ་ན་བསམ་པ་ཚོས
རུས་ཐལ་སྤར་མོ་གང་རུམ་ནང་དུ་བཅུག་ཏེ
སྙིང་རླུང་དང་སྐྱོ་བའི་ནད་ཀྱིས་མནར་བ་བསམ་ན
རྨི་ལམ་དང་མི་ཚེ་ནི་བསླུ་བྲིད་ཅིག་སྟེ
ཤ་ཁྲག་གི་བརྩེ་དུང་ལ་ཀུ་རེ་སློང་མཁན་ཞིག་རེད
འདང་བརྩེ་ལ་ཞེན་ཆགས་དང་སྐྱོ་སེམས་སློང་མཁན་གྱི་འཚུབ་མ་ཡུན་གཅིག་རེད།
Leave a Reply